السلام عليكم ورحمه الله وبركاته
بما ان انا البنت الوحيده فى المنتدى ههههههههههههه فعمل الموضوع وارد على نفسى
انا مريت بموقف كتير وعشان هو موقف مش سهل حبيت اعرضه عشان نتناقش فيه
أكيد أي بنت في سن الجواز وهي في بيت أهلها مرت أو هتمر بالموقف
اللي هقول لكم عليه دلوقت
يرن جرس التليفون وتلاقي واحدة قريبة مامتك من بعيد بتتصل بيكم في البيت وبعد السلامات والتحيات والذي منه تلاقيها بتسأل مامتك السؤال ده
هو بنتك اللي لسه مخلصة الجامعة اتخبطت؟ مامتك هتقول لها لا والله لسه النصيب مجاش.
هتقول لها طيب أنا ابني بشمهندس زي الفل وبندور له على عروسة وأكييييييييييد مش هنلاقي أحسن من بنتكم إيه رأيك ممكن نيجي البيت عندكم والولاد يتعرفوا على بعض يمكن يحصل نصيب مامتك هترحب وتقول لها تشرفوا في أي وقت أهلا وسهلا
وبعد كده هتقول لك اعملي حسابك إن فيه ناس جايين الأسبوع اللي جاي
أنت في الوقت ده بتضايقي جدا وبتكوني مش عارفة تعملي إيه أو تلبسي إيه وخايفة ومكسوفة ومحتاجة حد يساعدك ويقول لك على اللي المفروض تعمليه في موقف زي ده
عايزين نقف جمب اى بنت جاى لها عريس
ونقول لها ازاي تتصرف في الموقف ده
علشان يعدي بسلام
هناك قاعدة تقول إن
"الانطباع الأول يدوم"
يعني الفكرة اللي هياخدها عنك اللي جاي ده في أول لقاء هيترتب عليها حاجات كتير قوووي نفس الشيء بالنسبة ليك الفكرة اللي هتاخديها عنه من أول مرة هيترتب عليها حاجات كتير قوووي
علشان كده عايزاكى تبقي ناصحة وتقدري بأسلوبك وذكائك تتركي انطباع كويس عنك عنده حتى لو محصلش نصيب.
طبعا هتسألي نفسك وتقولي ازاي ده أنا مكسوفة مووووت ومش عارفة أعمل إيه وحاسة إني هلخبط الدنيا
وعمالة أتصل بصاحباتي وكل واحدة تضحك عليّ ومحدش قال لي كلمة مفيدة أقدر أستفيد بيها
ماتخافيش أنا دلوقتي همشي معاك خطوة خطوة وأقول لك تعملي إيه
الخطوة الأولى
جهزي نفسك نفسيا ومظهريا
علشان ماتتعبيش نفسك وأعصابك على الفاضي ياريت تشيلي من دماغك فكرة إنك بضاعة جاي يتفرج عليها لأن دي
حاجة مش صح وحطي في دماغك إن ده جاي يتعرف على البنت اللي ممكن تكون شريكة حياته وإن دي حاجة مش عيب ومفيش منها أي تقليل من شأنك
حاولي على قد ما تقدري تخلي أعصابك هادية جدا وتبعدي عن أي مصدر قلق أو توتر علشان التوتر ممكن يبان على وشك واحنا مش عايزين كده احنا عايزين عروسة زي القمر وياريت كمان قبل الميعاد ده تاخدي دش دافي
بعد كده ادخلي الأوضة عندك وابدأي في اختيار لبسك وعلى فكرة النقطة دي بتحير بنات كتيييييييير قووووي لأنهم بيحتاورا يلبسوا كلاسيك ولا لبس عادي
بس بيني وبينك ياريت أول مرة دي تلبسي لبسك العادي اللي أنت بتلبسيه وأنت خارجة يعني
وبلاش موضوع إنك تلبسي بدلة لأن دي هتخلي الحكاية تبقى رسمي قوووي وممكن تبينك أكبر من سنكواوعي تنسي تختاري الألوان اللي تكون مناسبة عليك وتنور وشك
لو كان اللقاء ده هيتم في البيت فياريت ما تلبسيش كعب عالي
ياريت في اليوم ده ما تكتريش في المكياج علشان ما تبقيش عاملة زي البلياتشو
... وخليك بسيطة جدا في مكياجك يعني كفاية قووي الكحل وتحطي ماسكرا وبلاش أحمر خدود لأن طبيعي جدا إن وشك هيحمر في اليوم ده فمش هتحتاجي لأحمر الخدود لأنه هيكون موجود طبيعى
خليك متفائلة وتوقعي الخير علشان تلاقيه خير وتوكلي على الله وفوضي أمرك إليه، وادعي ربنا يوفقك في اللي فيه خير ليكي
أعتقد إنك لو عملت الحاجات اللي قلنا عليها دي هتكوني فعلا استعديت للقاء ده وتعالي نشوف اللي المفروض تعمليه أثناء اللقاء ده.
الخطوة التانية
أثناء اللقاء نفسه
بلاش تشيلي صينية عصير في إيدك وأنت داخلة لأنك ممكن ترتبكي وتوقعيها على اللي قاعدين كفاية قووي إنك تدخلي بابتسامة بسيطة وتسلمي على كل اللي موجودين واقعدي وخليك شاطرة واختاري إنك تقعدي في الكرسي اللي يكون مواجه له علشان تقدري تشوفيه كويس لأن ده حقك الشرعي وخليك واثقة من نفسك وأنت قاعدة وخدي الموضوع ببساطة علشان يعدي على خير
لو مامته جات معاه ياريت تخلي بالك وأنت قاعدة منها وبلاش تكشري في وشها وهي قاعدة خليك مبتسمة ليها دايما حتى لو قالت حاجة مش عجباك اوعي تردي عليها وكلميها عادي وحاولي تكسبي رضاها وخليكى ذكية وفكري في كل كلمة قبل ماتقوليها .
وأنت قاعدة اتكلمي براحتك من غير تكلف وافتحي مجالات للكلام واسمعي ليه كويس وهو بيتكلم علشان تقدري تحكمي عليه
لو فيه حاجة تضحك يا ريت ماتضحكيش ضحك بصوت عالي أو ضحك هيستري كفاية قوووي ابتسامة بسيطة
خليك جريئة بس مش اى جراءه .. ولو وجه لك الكلام ردي عليه بذوق وادب من غير كسوف
كمان خدي بالك قوي..
لو سمحت الظروف وقعدتوا مع بعض ياريت تتكلمي معاه في أمور عادية جدا زي مثلا البرامج اللي بتعجبك في التليفزيون أو عن حاجة تكون حصلت قريب وشدت انتباهك وابعدي عن الكلام في أي مواضيع تكون مسار جدل زي مثلا الكرة والأهلي والزمالك ..
ولو تطور الكلام بينكم لأي مواضيع فيها جدل خليك ذكية وبلاش يكون عندك تحيز في الرأي واسمعي منه وابدي رأيك بأسلوب لطيف من غير ما تحرجي نفسك أو تحرجيه .
واوعي في أول كلام بينكم تسأليه أي أسئلة شخصية أو أسئلة محرجة زي مثلا إنك تسأليه إذا كان خاطب قبل كده ولا لأ أو مثلا مرتبك كام ؟؟ لأن الأسئلة اللي من النوع ده ما ينفعش تسأليها في أول مقابلة
لو كان اللقاء في مكان عام زي النادي مثلا أو خلال مناسبة ما فحاولي تقللي من نظراتك حول الأشخاص الموجودين في المكان وركزي في الشخص نفسه .
الخطوة الثالثة
بعد انتهاء اللقاء
بعد ما يمشوا عايزاك تقعدي مع مامتك ( ونفسك أولا ) وتفكري معاها كويس وشوفي إيه اللي قدرتي تطلعي بيه من اللقاء ده لأن فيه حاجات حتى لو بسيطة هتكون بانت قدامك ولو مش قادرة تحكمي كويس يا ريت تطلبي لقاء تاني علشان تقدري تحكمي على أساس صح وربنا يوفقك ..
ولغاية هنا وخلص كلامى بس مستني أعرف منك رأيك إيه ؟ في النصائح اللي قلت عليها دي
هل فعلا النصائح دي مفيدة وممكن تعمليها لما تتحطي في الموقف ده؟؟؟
ويا ترى مريتي قبل كده بموقف زي دا ؟؟؟
مستنيه الردود ..
السبت يوليو 18, 2009 6:44 am من طرف bebo
